Book description Awal ad d−yini awal D asefru neɣ d izli, tamedyazt tezga deg yirebbi n wemdan seg wasmi i d-tella yemma-s n ddunnit. Iger tamawt i tegnatin n tumert d uneɣni i zemren ad d-ffɣen seg yedmaren-is. Di timli-nsent, tignatin-agi, s ucebbeḥ i wawalen i yesnefsusuy i tlufa, i d-yeslalay asirem. Ulamma mgaradent talɣiwin n tmedyazt seg wegdud ɣer wayeḍ, seg yedles ɣer wayeḍ, si tmeslayt ɣer tayeḍ, ger wergaz d tmeṭṭut, tesdukkel-itent taneffut d yeslali-tent-id uḥulfu. S wakk-agi, mi d iyi-d-yessuter Ɛli « sin yimeslayen wezzilen… » ɣef tmedyazt-is, kukraɣ acemma tira n « sin wawalen !» ɣef wawal-is. D acu-yi, nekk, akken ad aruɣ tazwart i wammud-agi n yisefra-s? Acu ara mleɣ i yimeɣriyen-is? Kukraɣ ad aruɣ ɣef wergaz yesnin, ma drus, tlata temrawin n yiseggasen di tmedyazt : ger tɣuri d tira d umeslay ɣef usefru. Yiwen am Ɛli, aneɣrim di tmedyazt, ansi i s d-kkiɣ, ččiɣ-as lḥeqq. Ur yuklal ara kan ad as-iniɣ « telha tmedyazt-ik, tgerrez, ddu ɣer sdat… ». Tewwi-d awal i wawal, awal i wallaɣ d tegzi i d-imeslen awal akken ad yeẓẓerẓer di tmeẓẓuɣt ara yessembiwlen ul, ara yesmentgen allaɣ n yimeɣri d umesseflid. Yura-d dagi « awal mačči kan d awal … yiwwas awal ad d−yini awal ». Ulamma yiwen kan i yuran isefra-agi, tikwal yettmeslay Ɛli i yiman, tikwal yelti-d yid-neɣ, tikwal nniḍen d kečč akked kemmini. Yenna-tent-id wammud-agi yiwet yiwet : « Tamurt si zik i tt−neffeɣ », ɣer « Temẓi tettferfir », ɣer « Yiwen yiwen i teffɣem », ɣer « D aṭṭan i yeǧǧuǧǧgen », ɣer « Teḍra−aɣ am skeṛ », ɣer « Acimi »,… almi d « Urgaɣ ayen din / Ad d−akiɣ tura » akken ad d-yerr imeɣri ɣer « Macahu, tellemcahu.../ Wissen anda tetteddu » d useqsi n wawal « Anwa ara k−islen, ay asefru? ». Twalam… yezzi-d ugeswaḥ yis-neɣ… Annect-agi d acali di twennaḍt n tmeddurt, d ancad ɣer tmuɣli d uḥettec di tlufa-nneɣ n wass-a. D wigi akkit i d-yessasayen tisura i tewwura yellan yakan neɣ i wesnulfu n wezrug ɣer tsufaɣ nniḍen… Dayen, fuṛa ! ur ẓriɣ ma yella kra i d-nniɣ. D acu kan, ḥṣiɣ aṭas i lqay wawal-is. Nnaṣeṛ Uqemmum.