Elisa e Marcela, dúas mestras galegas, protagonizaron en 1901 un dos primeiros matrimonios entre persoas do mesmo sexo. Elisa Sánchez Loriga, convertida en Mario, e Marcela Gracia Ibeas casaron na igrexa de San Xurxo da Coruña o 8 de xuño dese ano. Unha vez descuberto o «matrimonio sen home», foron obxecto dunha persecución que as obrigou a buscar refuxio, primeiro en Portugal e logo na Arxentina. Neste libro relátase a súa historia. En palabras do escritor Manuel Rivas, «temos un libro que é algo máis que un libro. Aquí está a novela de Elisa e Marcela que non foi quen de escribir dona Emilia Pardo Bazán». O autor ilumina dúas vidas unidas pola amizade e o amor, reconstrúe a actuación das autoridades académicas e xudiciais e analiza a repercusión pública dos feitos. Tamén achega novos datos sobre a andaina de Elisa e Marcela por terras arxentinas. Narciso de Gabriel é catedrático de Historia da Educación na Universidade da Coruña e autor de diversas publicacións. Entre os seus libros figuran Escolantes e escolas de ferrado (Xerais, 2001, Premio María Barbeito, Losada Diéguez e da Crítica), Ler e escribir en Galicia. A alfabetización dos galegos e das galegas nos séculos XIX e XX (2006, Premio Concepción Arenal) e 25 anos de UDC. A Universidade na Coruña e Ferrol (2015). Na actualidade dirixe Sarmiento. Revista Galego-Portuguesa de Historia da Educación.